موضوع مهم

[حنين الزاملي]

اللهم صل على محمد وال محمد

بسم الله الرحمن الرحيم - ولو طولت عليكم با المناقشات ان شاء الله الاستفائدة ذكر فان الذكرى تنفع المومنين لان اكو امور مهمة يجب ان نوضحها بلكي من خلال كلامنا واقلامنا نغير ولو جزء بسيط لان احنا غافلين ومو معصومين واسال الله ان لايجعلنا من الغافلين وان يقلل عثرتنا ويستر نا بستر فاطمة الزهراء وزينب عليهم السلام وان نقتدي بهن لان زينة المراة هية حجابها وعفتها وان شاء الله عفتنا وحجابنا من حجاب فاطمة الزهراء وزينب عليها السلام ويارب نقتدي بهما لانهما قدوة لنا واستر عورتنا بحق محمد وال محمد

طبعا احنا غايتنة من النقاش مو بس كلام ان شاء الله الاستفادة والتطبيق لان توحد اهواي امور ليست في بالنا او جهل او غفلة ونعتقدها حلال واحنا نحاول قدر استطاعتة نوصل كلامنا للاخوات ويارب اتمنى مايكون نقاش لان اهواي مواضيع مهمة تحتاج الى تنبيهة اكو حالة موجودة عدنا وعد امهاتنا وخصوصا الكبار السن كلمة هذا عايش ويانة او هذا مثل اخوية او هذا نيتة صافية وربيتة على ايدي او صديق العائلة والى -------اخرة طبعا هاي الحالة شفتها بكثرة نسبة سبعين بل مئة من مجتمعنا وياريت اكو فايدة من كلامي يعني وحدة لبسة حجاب وملابس طويلة بس هية تتمازح وي حماها بمزاح عجيب يضربها وكلام ويضحكون من تسلها تكول حماي وكاعد ويانة وامزح ويا واكو وحدة ابن خالها او خالاتها ما تلبس كدامة تكول عايش ويانة مثل اخوية و حجيات كبار يصافحون ويبوسن بسلام من تسلها تكول مثل ابني او وحدة عندما تتزوج وهي صغيرة من يكبر حماها تكول ربيتة على ايدي والكثير من هذة الحلات والشرع حرم الاجنبي وهذا ماطول حلل عليج حرام مصافحتة حتى لو كان ساكن معاك وذا نيتة سليمة او عايشه ويا او تعتبيرنة مثل اخوج يعني وين حرمة حجابج على ناس وناس الله حرمة على كل ماعدا الى ما محرم عليج هذا نقص بلحجاب وااحب اكرر ترة الحجاب مو بس عل الشعر لازم حجاب جميع الجوارح اصلا الي يبلغ الحلم المفروض تلبسين ومتصافحين ولا تلمسين وتتحذرين حتى ولو ابن حماج ااكو البعض تستحي وماعرف شنو ادري هاي الاشياء تدخلك بنار جهنم وحدة تكول خاف البس ويحس انو غريبة او هوة يكول مثل اختي حتى ولو يكول الشرع حرم ارجو الانتباة واحنا هواي نغفل على امور لازم ننتبه لها قبل يجي يوم لاينفعنا اي شي مابيها شي ترة الشرع حرام على كبير وصغير مو لن حجية وبكد ابنها لا ماطول حرم عليج يعتبر اجنبي طبعا اني اتكلم وياكم وماكدرت اغير هاي الضاهرة بيبيتي لسة من يجي حماها تبوسة وتكول بعد هذا العمر ترديني ماسلم علية تكول تعودنا وكثير من امهاتنا يكولن تعودنا انو نصافحة ونبوسة بس هوة حاسبنة مثل اختة وارجع واكول الشرع حرم هاي السوالف ترة متفيدنا ابد لا عذر ولا نية يجب ان نغير هاي الحالة واترك الكم الكلام والتعليق وارجو ان تكون اطالاتي بل مواضيع استفائدة

[ام حيدر العراقيه]

اللهم صلي على محمد وال محمد
صحيح انه هم شايفه هيجي حالات
واكيد هذا حرام
بانه لازم تلبس كدام حماها الحجاب الكامل
وحتى الاقدام لازم تسترهم
وماتظهر مفاتنه امامه
وتخلي زينه
وطبعا مو كل النساء
انا اعرف نساء ملتزمات وحتى عباءة رأس يلبسون امام حماهم وبنفس البيت
بحيث يقومن ويقعدن وهن لابسات العباءه

الله يوفق الجميع ان شاء الله
احسنتي اختي الغاليه
مواضيعك مهمه وتتكلم عن واقع
تحياتي لك

[منار الزهراء]

رائع موضوعج أختي حنين
هاي السالفه ملينا بالكلام بيها والله آني من أشوف مثل هالتصرفات أحس قشعريرة تسري بجسمي
مابيهة شي اذا الوحدة تشاقة وية حماهة لكن بحدود معقولة لكن ماتصل للمس
انا الحمد لله تزوجت انسان جدآ ملتزم وهذه الامور بصراحة ماكنت منتبهتلها لكن هو نبهني
وهسة آني ألبس عباية أسلامية مع الجواريب والتحنيكة والمعاصم أمام أخوان زوجي وأبنائهم
وهم جدآ محترمين هذا الشي
لكن بعض نساءهم تكلي هاي عيارة نسوان شكو بيهة هو مثل أخوج لكن مؤكد ماكو وحدة تريد مرت حماهة تكون أحسن منها بشي
تصوري الملتزمة يكللولها هذي معقدة والحمد لله آني بالنسبة لي أرتاح من يكلي أحد هذه الكلمة لان يحسسني انه آني صح
تصوري اول ماتزوجت لبست بوشية
من أروح لاهلي أقاربي يصنفون علي يكولون أجت ترجع ليورى يعني مامبين وجهي من كفاي
لكن كنت أنقهر من كلامهم
وبعدين أثبتت لهم أنه انا الوحيدة الصح
أما العجايز ماكو فايدة من أي كلام وياهم
وبالمناسبة أحب أضيف حالة حتى أكو يقبلن أبن اخو الزوج وابن أخت الزوج على هذا مثل ابني وهو شاب
ومن تكليلهة حرام تجاوب انوب منيلكم حرام بكيفكم تحرمون
والمجتمع هذا مشكلة مشكلته
مايرادلهم غير ابوصالح سلام الله عليه
طولت عليكم اعذروني

[لهيب العراقية]

السلام عليكم
الاخت حنين الزاملي شكرا لمواضيعج الممتازه
المجتمع بحاجه الى تغيير والتغيير يبدا من داخلنا
وكبار السن من الصعب جدا تغيير عقولهم وتفكيرهم والتغيير يبدا بالشباب فهم عماد المجتمع ومستقبله

[حنين الزاملي]

مو هية اكو امو ر حرام احنا نمشيها بس قد استاطعتنة بلكي نكدر نسوي شي