لنتخيل ان هناك زوجا .. منقول

[جنة المشتاق]

لنتخيل ان هناك زوجا اعتاد ان يسجل مذكراته اليومية في كراسة خاصة، وفي يوم غير متوقع توفي هذا الزوج قبل ان يتلف هذه المذكرات، وسقطت بيد زوجته، فقرأت ما لا يسرها، فكيف تكون ردة فعلها؟!

1 - «مذكرات زوج رقم 1»

التاريخ: الاثنين 7 - 5
اليوم حاولت اتصل فيها بس ما ترد، عيزت وأنا اركض وراها، وبالي وياها مشغول، اكيد زعلانة عشان ضايقتها بكلمتين، ما ظن النوم اليوم بييني، وهالبومة اللي يمي بس قاعدة اتحقق معاي، حتى لو حلمت تقولي اش حلمت فيه؟!
.. ومو بعيد من كثر شكلها باچر لو ادخل الحمام بتقولي اش سويت؟! عاد لو تدري شنو احلم فيه كل يوم چان شقت اهدومها.. ههه.

ردة فعل الزوجة:
زين ربي خذاك وفكني منك.. أنا بومة يالخاين ياللي ما بينت فيك هالعشرة الطويلة؟.. يا ليت اعرف بس منو هذي اللي طيرت من عينك النوم عشان اطير راسها.. بس هين مصيري اعرفها.. وانت اشبع موت.. آآخ يالحرة!

2 - «مذكرات زوج رقم 2»
الأربعاء: 9 - 7
اليوم هاللي عندي ماده بوزها شبرين عشان تأخرت بالديوانية، قلت اراضيها بس تحسفت، وخليتها زعلانة لين اخمدت وفخت، وأنا رحت باحلامي الوردية.

ردة فعل الزوجة:
طول عمرك ما كان عندك ذرة احساس، وعايشة مع واحد يلعب على الحبلين، بوفر ادموعي حق اللي يستاهلها.. واشبع موت.. وموت حره لاني للحين أنا عاااايشة!

3 - «مذكرات زوج رقم 3»
الجمعة: 5 - 2
اليوم عزمت اهل المره ثجيلين الدم، ومثل كل مرة قعدت اجاملهم واسولف وياهم واضحك، وانا بداخلي اقول «ما يسـتـاهلون ولا حتى تستاهل بنتهم» وما صدقت يطلعون جنهم قاعدين على قلبي، صج لوعة جبد، مليت هالسنين كلها وأنا على هالحال!

ردة فعل الزوجة:
كل هالسنين قاعد اتجامل اهلي وتضحك معاهم جذب؟! أنا ما استاهل ولا اهلي بعد؟! الحمد لله اللي افضحك وبينك على حقيقتك، وأنا حسبالي كل هالمدة اتسوي هالشي عشاني، لكن انا اللي اقول انت اللي ما تستاهل الوفا!

4 - «مذكرات زوج رقم 4»
التاريخ: السبت 1 - 6
جذبت عليها وقلت لها اني رايح العمرة، مسكينة دايما امصدقتني هالمخدية، بس انا مو امسافر ولا شيء، لكن كالعادة عند زوجتي وحبيبتي الثانية، عاد انا اشتريت لها چم قطعة خـــام وساعة وطارت فيهم، واما الماي اللي قلت لها عنه انا ماي زمزم طايحه تشرب فيه هاليومين، ساعات تكسر خاطري اني ساحب عليها، بس ما يهمني.. «عادي طبيعي مزاجي.. مووول ما حـــاتي!! »

ردة فعل الزوجة:
شنو؟! اتاري كل هالمدة قاص علي وتلعب بذيلك من وراي ومتزوج بعد يالچذاب، صچ أنا المخدية اللي ما شكيت فيك لحظة وحدة، يا علك تموت حسرة بقبرك، وهاللي متزوجها علي.. لطلعها واروح لها اغسل اشراعها واخليها تندم عاليوم اللي خذتك فيه.. واستغفلوني.. انزين هين!

يتبـــــــــــــــــ >_* ـــــــــــــــــــــــــــع

[جنة المشتاق]

مذكرات زوج رقم 5

يوم الخميس 8/3
صچ هالأيام أحس براحة، من أدش البيت الكل نايم، وحتى أم العيال من كثر تعبها في الدوام ولويتها مع العيال والبيت، ماتصير الساعة 9 الليل إلا ونامت مع اليهال مثل الدياي، وچم مرة مسكينة من تحس فيني داش البيت تحاول تشيل نفسها من الفراش، وتسألني إذا أبي شي أو محتاج شي، وآنا أقص عليها أقول لها لأ روحي نامي أنا أبي راحتچ أهم شي عندي بالدنيا، وما تدري اني برتاح من شوفتها وأفضى حق الجو مالي أيااابا.

ردة فعل الزوجة:
لا مو امصدقة كل هذا يطلع منك، وحسبالي اتدور راحتي كل هالمدة؟ لكن ما قول إلا آنا الحين اللي برتاح من شوفتك دام كانت نيتك شينة واتسوي كل شي من وراي لأني صدقتك، موووت فكة منك والله حسيبك.

مذكرات زوج رقم 6

يوم الثلاثاء 9/6
اليوم صار بيني وبين زوجتي خلاف على شي بسيط، والسبب إني قمت ما استحمل منها أي زلة أو خطأ، ودي أقول لها إني ندمان على اليوم اللي تزوجتچ فيه، لو متزوج أخت رفيجي فايز (أموله) أبرك لي من هاللي عندي، بس طافت علي واهي تزوجت من واحد ما قدرها، ومن دريت انها اتطلقت وآنا قاعد أدور أي غلطة صغيرة من زوجتي عشان ألقى مبرر حق زواجي من حشاشة يوفي (أموله) اللي روحي معلقة فيها، بس متى؟

ردة فعل الزوجة:
آنا أقول ليش الريال يدور عليّ الزلة وآنا مو امقصره معاه، أتاري السالفة فيها أخت رفيجه اللي امجابله ليل نهار؟ آنا المخدية والغبية اللي ما لاحظت هالشي، والمصيبة يدلعها وامسميها (أموله) هذي حدها ينادونها (أميلوه) ويخب عليها، بس الحمد لله اللي ربي خذا روحه وما طال منها شي، وآنا اللي باخذ غيره وأقول الوفا حق هالأشكال غبااااء، ولا للوفا لا و ألف لاااا.

مذكرات زوج رقم 7

يوم الأحد 15/9
باچر بتبدي المدارس وأنا مستعد مع العيال وقلت حق هالمرة اللي عندي أني مابي اتعبها، وآنا اللي بودي اليهال وأييبهم من المدرسة واستانست، ما تدري أني فرحان أكثر منها لأني بصادف كل يوم أبلة بنتي، وأكحل عيني بشوفتها، بس لو تعطيني ويه أرتاح.

ردة فعل الزوجة:
وآنا أقول ليش خاب نفسه وشاد حيله يودي العيال وييبهم بدون لا يتشكى؟ ربي لك الحمد اللي كشفته وطاحت بيدي هالمذكرة، لكن صاچة اللي قالت «يا امأمنة بالرجالة يا امأمنة الميه بالغربال» وكفو على هالأبلة اللي ما عطتك ويه يالخاين.

مذكرات زوج رقم 8

يوم الإثنين 5/8
تاريخ اليوم يصادف تاريخ زواجنا، عطيتها هدية بس عشان تصك حلچها، ودزيت لها نغمة اهداء على موبايلها، وقلت لها انها بمناسبة حبنا اللي استمر 10 سنين في عش الزوجية، لكن هذا بالمشمش، أي حب؟.. وأي بطيخ؟.. أصلا اهي لو تقعد يمي أحس اني قاعد مع واحد من الربع اللي چنه بودي قارد، ما قول إلا يارب صبرني.. وعطها اشوي من هالأنوثة اللي عند باجي الحريم.

ردة فعل الزوجة:
آآآنا لو تقعد يمي تحس انك قاعد مع واحد من الربع؟ آآآآنا ما فيني أنوثة ياللي ما فيك ريحة رجولة؟.. آآآخ لو ادري أنك كاتب فيني چذيه قبل لا تموت چان ساحبتك من ارقبتك چدام الأولي والتالي، وأخليك بيزة ما تسوى.. آآآخ لو بس مو ميت.. لكنك رحت من ايدي يا حسافة، وإلا چان شرشحتك تشرشح ونشرت اصورك بالجرايد عبرة لباجي الرياييل.

[نسمات الهدى]

ههههههههههههههههمهههههههههههههه يسلمووووووووو حبي والله تموت من الضحك يسلموووو يشرفني اكون اول عضوة تدخل موضوعك

[جنة المشتاق]

المشاركة الأصلية كتبت بواسطة نسمات الهدى

ههههههههههههههههمهههههههههههههه يسلمووووووووو حبي والله تموت من الضحك يسلموووو يشرفني اكون اول عضوة تدخل موضوعك

حياج عزيزتي .. تشرف الموضوع بمرورج
موفقة >_*

[النوراء]

آآآخ لو بس مو ميت.. لكنك رحت من ايدي يا حسافة، وإلا چان شرشحتك تشرشح ونشرت اصورك بالجرايد عبرة لباجي الرياييل.

ههههههههههه

يستاااااااااااااااااهل ما حد قال له خخخ

تسلمي /

جنة


على الموضوع الرآآآئعــ xD

تحيآآآتي . النورآء

[جنة المشتاق]

المشاركة الأصلية كتبت بواسطة النوراء

ههههههههههه

يستاااااااااااااااااهل ما حد قال له خخخ

تسلمي /

جنة


على الموضوع الرآآآئعــ xD

تحيآآآتي . النورآء

خخخخخخخخخخ .. ودها تنتقم منه بس اشلون
نورت الصفحة بمرورج نونو
موفقة >_*