من قالك تعترف؟

[جنة المشتاق]

بعض الأحيان تمر على الانسان فترة يبي فيها نقاهة لمدة ساعة عالأقل، ويندم على هالدقايق اللي طلع فيها بسبة العايلة اللي امناشبته في كل شي،

تصور نفسك أيها الزوج وانت زهقان وحبيت تطلع بروحك تاخذ لك عصير بارد من المطعم وتتمشى بسيارتك بهدوء وتفكر بحياتك وأمورك الخاصة، وتحط لك شريط ناوي تسمعه على رواقة،

وما توعى إلا واحد من اعيالك لازق فيك، ويسحب بهدومك، (يا سلام على هالمنظر) ياخي فكوا اشوي.. يقعد يبجي ويترجاك وينبطح على الأرض ويتلوى وحركات من هالسوالف الغريبة، فترضخ للأمر بسبة هالمشاعر الأبوية اللي ذالينا فيها الصغار، وتقعد تهدد وتتوعد لو أزعجتني يا ويلك، لو قمت تتطلب هم ياويلك، إن قلت ردني للبيت بزتك من الدريشة زين سامع؟ إي سامع.. سامع، ويحلف ما يأذيك ولا يتطلب ولا يحرك حتى اللسانه (طبعا مو هذا المطلوب).. ولما ترضى وانت مغصوب، تلقى الثاني لا حقك ليش اتوديه وما توديني؟ ليش انته تحبه وما تحبني اهئ اهئ اهئ؟ ويبدي التمثيل اللي على أصوله.. اهنيه تبدى تسب نفسك، لو قاعد في البيت أبرك لي، لو منحاش عنكم بدون لا اتحسون جان ما صار اللي صار، أصعد انت الثاني آنا مينون اللي يبتكم.

المهم.. الحين ما صار واحد.. صاروا اثنين، وطبعا زوجتك مفتكة من حنتهم ولويتهم في البيت، وانت اللي ناوي تونس نفسك وتاخذ راحة نطوا جدامك ولزقوا فيك لزقة معتبرة.. وقبل ما تحرك تلقى الحرمة تطل من الباب ومعاها ولدها الصغير «اشدعوة عاد.. قولي تعالي معانا، واش معنى هالصغير ما خذيتوه؟» اهنيه طبعا أسمح لك تقول: اهئ اهئ اهئ، عشر مرات.

تركب الحرمة ويا العيال، أول ما تحرك سيارتك، يتكافخون الثلاثة اللي ورا، على شنو؟ الجواب: لعدة أسباب، الحرمة تحاول تسكتهم لأنها تدري انها ضيفة ثقيلة وياية غصبا على شواربك، ولازم تهدي الوضع عشان تصير الطلعة حلوة وهادية، ولما يحصلون جم زفة وجم طقة يهدا الوضع، وأول ما توصل للمطعم تبي تطلب عصير، يبدون اليهال كل واحد يعطيك طلب مختلف، وواحد فيهم يقول أبي وجبة مابي عصير ويفك حلجه يصيح بالسيارة ويقعد يرفس بيده وريله.

والحرمة اتسوي نفسها مهتمة بالموضوع لأنها تدري عقب ما الريال تطق مرارته بهاليوم، بيحط حرته فيها، وبعد مدة يهدا الوضع وانت لازلت تنافخ وتتحلطم عاليوم اللي تزوجت فيه.

أول ما تحس بهدوء تحط الشريط اللي بخاطرك تسمعه، تنط الحرمة وتقولك «ويع من وين لك هالشريط حط لنا غيره» أو اليهال يعترضون يبون تحط لهم شريط أطفال، ولما تعاند وتحط شريطك، فجأة واحد من هاليهال يطلع له سالفة، يبجي يبي «الحمام» والا واحد طاح عليه العصير وانتلفت اهدومه، والا واحد يتخانق مع اللي يمه علشان يقعد يم الدريشة، وأنت الدخان يطلع من راسك من القهر والحرة، وعقب ما تسكتهم وتعطيهم جم طقة من العقال اللي على راسك، يهدا الوضع بعد ما ينام واحد فيهم،

الحرمة اهنيه عاد تبي تلطف الجو بطريقة رومانسية، فتحاول تستخدم أساليبها الأنثوية بوقت غير مناسب (مخ حريم)، بس الريال امدخن وده يحذفها من الباب اهي واعيالها، واهنيه طبعا الحرمة تتأثر ليش زوجها عافس ويهه، وماد بوزه، ويتحلطم طول الطريج؟.. وتقعد تمد بوزها اهي بعد شبرين، وأول ما تسمع صوت مسج وإلا تيلفونه دق، يدق قلبها وراه امية دقة، ودها تعرف منو؟

«يمكن يكون جو ثاني علشان جذيه ماله خلقي ولا خلق اعياله» عاد يبدا الوسواس يشتغل ويعفس نفسيتها عدل، «ليش مارد عالمسج؟». ليش ابتسم يوم قراه؟.. ليش يوم دق النقال حطه عالصامت؟.. وليش وليش وليش؟» واهنيه تشب الشرارة وتبدا تعطيه من الأسئلة اللي تسم البدن، وتحقق معاك، وتبدا المعركة الصجية (طاخ وطيخ وطاخ).. والطلعة الحلوة الهادية اللي كنت تتمناها تطلع من جبدك، مو قلنا لك من أول لا تصدق بجي اليهال.

نصييييييييييييييييييييحه :

اللي يبي يطلع طلعة راحة وهدوء أحسن له لا يعترف بهالشي جدام المدام، وخل يقولها: «أنا رايح لمزاد الصخول»، تدرون ليش؟ لأنها أول ما يطري على بالها «الريحة».

[محبة لاهل البيت]

مشكوره اختي على الطرح
بس مو كل رياجيل مثله

[جنة المشتاق]

المشاركة الأصلية كتبت بواسطة محبة لاهل البيت

مشكوره اختي على الطرح
بس مو كل رياجيل مثله

أكييييييييييييييييييييييد
" لو خليت خربت "
موفقة >_*
نورتي