الشرهة على منو؟

[جنة المشتاق]

أفراح طالبة في الصف الخامس الابتدائي، وأمها حريصة على دراستها، ومتابعتها دائما، ويهمها أن تسمع عن ابنتها ما يسرها عند معلماتها، ولكن ما حدث كان عكس ذلك.
بين أفراح ووالدتها:

- يمه تكفين لا تروحين اجتماع الامهات.

- ليش؟.. عشان ماتبيني أعرف اشلون صايرة بالصف مع أبلاتچ؟

- لا مو جذيه، بس انتي كلما رحتي اجتماع الأمهات اتصدقين الأبلات على الكلام اللي يقولونه عني، وتعصبين علي واتطقيني، مع ان اللي يقولونه كله جذب.

- يعني تبيني أصدقچ وما أصدقهم؟

- إي.

- لا.. أنا بروح وبسألهم عنچ، وبصدق اللي يقولونه عنچ وأراويچ لو قالولي عنچ شي مو زين.

- لا يمه لا تروحين.. اهئ اهئ اهئ.

في يوم الاجتماع:

مع معلمة الرياضيات:

- أشلونچ أبله؟ أنا أم أفراح، اشلون بنتي معاچ بالصف؟

- انتي أم أفراح؟ ما صدقت أشوفچ.

- ليش عسى ما شر؟

- بنتچ هذي ما تقعد على حيلها بالصف، وتتحرش بالبنات، ولا
تكتب الواجب، وكله ناسية كتابها، ومو حافظة حتى جدول الضرب.

- بس آنا بنتي هادية ومو طبعها جذيه، وبعدين آنا كل يوم أسمّع لها جدول الضرب.

- لا يا أختي بالمدرسة بناتكم يصيرون شي ثاني.

مع معلمة اللغة العربية:

- آنا أم أفراح، ممكن اتقولين لي اشلونها بالصف؟

- بسألچ بنتچ اشلون طبعها في البيت، مشاغبة بعد؟

- لا بالعكس بنتي حبوبة وهادية وتتعامل مع اخوانها بطريقه ذربة.

- بنتچ هذي امطلعة لي اقرون، السانها طويل وتقل أدبها على الأبلات، وچم مرة أوديها للاخصائية وتاخذ عليها تعهد، اهي شنو ما قالت لچ عن هالشي؟

- بنتي آنا؟

- إي بنتچ انتي، وروحي اسألي الاخصائية بعد.

- انزين أراويها إن ما طقيتها طق وعلمتها اشلون تخش عني هالسوالف.

- وقولي لها تحفظ الأشعار اللي تاخذهم، وتحسن خطها.

- خلاص.. يصير خير.

مع معلمة الاجتماعيات:

- الحمد لله انچ ييتي اليوم.

- ليش اشفيها بنتي أفراح بعد؟

- بنتچ ما كأنها موجودة بالصف كله نايمة أو سرحانة.

- ماني عارفة منو أصدق، اللي يقولون لي بنتچ مشاغبة بالصف، والا اللي ماتتحرك كلش؟!

- بنتچ هذي اطبانة صدقيني، ولا تدري عن هوى دارها، وبعدين ترى بقول لچ إن دفترها ناقص، وماترسم الخرايط اللي أطلبها منهم، وهالشهر حطيت لها صفر لأنها ماقدمت التقرير اللي عليها.

- مو معقولة، آنا كنت معاها من اسبوع في المكتبة وسوت تقرير مع الصور، وطبعناه لها.

- ما عطتني إياها، وروحي اسأليها بعد.

- أروايها.. بس نرجع للبيت.

معلمة التربية الاسلامية:

- بنتچ ما تحفظ السور ولا الأحاديث، وتتهاوش دايما مع اللي يمها، وامسببة لي ربكة بالصف، مادري لي متى اهي جذيه؟!

- بس آنا دايما أسمّعلها الآيات اللي عليها والأحاديث.

- يمكن من الشطانة بالصف قامت تنسى.

- انزين أراويها اللي فورت دمي من الصبح، تمنيت اسمع كلمة من أبلة زينة عنها لكن للأسف على التربية اللي ما اتبين في جيل هالوقت.

مع معلمة الحاسوب:

- انتوا ما عندكم كمبيوتر بالبيت؟

- امبلا، وتشتغل فيه على طول.

- انزين عيل ليش ما تعرف تشتغل فيه عندي بالحصة؟

- مادري.

- عموما، آنا اللي علي أعطي درسي وأطلع، ومالي شغل بالباجي.

مع معلمة الفنية:

- بنتچ اتهبل، ورسمها فظيع، صچ انها فنانة وموهوبة عيني عليها باردة!

- ها؟!.. مو امصدقة اللي قاعدة أسمعه بأذني، انتي أول وحدة تمدحينها لي، بس بنتي مو ميولها فنية، وما عندها حب للرسم.

- وي ما شفتيها بالحصة عندي اشلون تبدع واتفنن.

- زين عيل، بنتي طلع فيها حس فني عالأقل.

- اممم صچ تذكرت، انتي بنتچ أي وحدة؟

- شنو أي وحدة؟

- احنا عندنا بالصف هذا ثلاث بنات كلهم بنفس هالأسم.

- ها.. اشقلتي؟!

شي ما شفتوه:
أم أفراح مع مديرة المدرسة:
- صار لي ثلاث اجتماعات احضرهم وأسمع الكلام اللي ينشف الريج، وارتفع ضغطي وسكري، وأروح البيت أطلع حرتي في بنتي، وبالأخير تطلع وحدة غيرها، لكن الشرهة مو على الأمهات لكن على أبلاتچ، اللي انتي مديرتهم!منقول
-----------------------------------------------------
هالموقف كان يصير معاي لما كنت بالمدرسة << طبعا أنا الطالبة المؤدبه
والمدرسات دايما يلخبطون بيني وبين وحده مشاغبه ولايطوفكم الزف من الوالده .. كاااااااااااااااااااااااااااااك