رقص الشباب بالاعراس .... انت "مع" أو ..." ضد"

[عشقي علي]

.......... زواج مبارك .... بالرفاء والبنين

هذي عبارات اللي يروحوا للعروس واهل العروس بليلة العرس يباركوا

بس الله يبارك للعروسين في عرس اغاني وموسيقى !!
واللي يقهر ويبط الكبد , اتقول لك ام العروس , هذي موسيقى؟؟؟ !!

اجل وش تكون
مو مشكلة ناس تعترف انه موسيقى بس متى لما اتروح زواجهم
تسألهم خمسين مرة قبل العرس فيه موسيقى يقولوا لك لا , اكيد ما فيه
ومن اتروح تتفاجئ , يردوا عليه برد انت تحتار بعده شترد
وهــــــــــــــو
لو قلنا لكم موسيقى ما بتجون , يا سلام خوش عذر" عذر اقبح من ذنب " او يلزقوها في العروس ( هيه جابت احنا ماندري)
اذا سيارتش عندش اتصرفتي بسرعة وطلعتي , بس اذا سيارة اللي جايبش ملتزم بكذا مشوار شرجعة وتضطري تقعدي في الحر بره ـ البرد بعد اهون ـ اما اذا اللي موصلش من اهلش عصبي " لا تعليق " سيأتيك وابل من السباب والشتم وانتي ساكته لأنش مو متحملة تردي ولا تنسبي
بعد فيه تطور جديد وهــــــــــــو
دخول اهل العروس يزفوها , اخوتها وخوالها , واعمامها .....الخ
واتشوف اختلط الحابل بالنابل عالكوشة
اللي مو راضية تتغطى من بنات الخال او الخاله او العم ... واللي اتحسب نفسها صغيرة واللي اتقول ما يطالع ... والله خوش رد , بصراحة رد مقنع افحمتينا بردش ما يطالع
واتشوف ذيك الأولاد خز ونز , اعظم من البنات , مرة يرقصوا مع العروس ومرة مع امها ومرة مع خالته ـ طبعا محارم كلهم انا ما اتكلم عن ان اللي يراقصهم مو محارم ـ
وذيك البنات بالعرس " المعازيم يعني " فنهم آخر
اللي مو متغطيه " ما صدقوا على الله ,هم في الطريق مو متعطيين, بعد بالصالة تبغاهم يتغطواوهم متمكيجين !! شعجب " واللي محجبة نص ونص , واللي اصلا مو معترفة انهم رجال بوسطة حريم , يعني ماخذه الدنيا طناش,
ويظلوا يترقصوا والمعازيم يتفرجوا , من اغنية لاغنية
والله استغربت بعرس من جاء المعرس ركبت البنت على الاستيج <<الجسراخذته طول وعرض رقص بعباتها ومتنقبه " الظاهر رقص المحجبات
من وين بعد كل هذا الله يبارك للعروسين
موسيقى , ورجال داخله العرس , وبنات مو متحجبات , ورجال تترقص" , واختلاط
ـــــ اسأل الشباب قبل الشابات
انتوا مع او ضد رقص الشباب في الاعراس داخل صالة النساء ؟؟" طبعا اكيد بيكون محرم عالعروس واهلها "
ــــ اذا كنت " مع " فلماذا , وما الجدوى ؟؟
واذا كنت " ضد " فما وجهة نظرك

اتمنى اشوف ردودكم واختلاف الرأي لا يفسد للود قضية "
نتعرف على راي الشباب
وايضا الشابات
صحيح إن المنتدى نسائي
بس مافي مشكله لو كل أخت تسأل
اخوها أو زوجها
يا الله همتكم