(بقلمي) كلهن تصير...ألا أم الحصير...قصة وعبرة

[حور عين]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

لما للقصة التالية من عبرة لاتخلوا من الفكاهة, فقد فضلت طرح الموضوع وبأجزاء كبيرة منه باللهجة العراقية والمعروفة باللهجة العامية , لأضفاء جو من المتعة في القراءة واستنباط الحكمة منها.

الحجية, الله يطول بعمرها تصلي وتصوم وتذكر الله ....وعدها هالوليدات الثلاثة اللي طلعت بيهم من الدنيا..والحمد هي والحجي ربتهم وتعبت عليهم وخرجتهم وزوجتهم وخلت كل واحد ببيته .
الحجية, الله يطول بعمرها ....كاعدة بهالبيت وحدها خطية, بعد ماراح الحجي الف رحمة على روحه.
وبيوم أندكت عليها باب الحوش. وماتشوف غير أبنها الجبير واكف على الباب.
الحجية: هاي يمة...هلا هلا بعد أمك....شلونك يمة, شلون جهالك...... دتعال طب ...خل أصب الك غدة
أبنها الجبير: الحمد الله يمة...كلنا زينين..أنت شلونج ..صحتج شلونها
لا...يمة تسلمين... مو جوعان...بس آني ضايج يمة كلت أجي شوية يمج.
- خيريايمة....خو موضايج ...تعبان... محتاج شئ...أحجي بعد أمك
- لايمة...شمحتاج ؟ مستورة الحمدلله ..بس آني يمة عندي حسبة وياج ومأريد تطلع لبرة
- كول يمة يابعد أمك...وسرك ببير,,,خير يمة أكو شئ ...صاير شئ بالشغل؟
- لا يمة ياشغل..الحمد لله الشغل ماشي
- لعد شبيك يابعد عيني
- يمة مرتي,,,,
-لاتكمل ياوليدي...مرتك حبابة وبنت خوش أوادم ..وماشاء الله ...الله رزقك على عينها وعندكم هالتلث أولاد ..فدوى أروحلهم
- أي يمة دصبري ..آني ماكايل شئ , والكل اللي تكولينه صحيح...بس يايمة ...وأنت أمي ..لمن تجي تنام....ريحة دشداشتها كلها بصل وثوم وكرفس وفجل ودولمة...ماكو أكلة ما أشم ريحتهاعلى دشداشتها
- بس يمة فهمت,لاتكمل روح لبيتك يبعد أمك..وأن شاء الله يصير خير

ومنعا لتكراد سرد باقي أحداث القصة ..فنكتفي بالقول,
أنه وبعد فترة حضر الأبن الأوسط لبيت الحجية..مشتكيا من زوجته ونسرد عن لسانهما المقطع التالي:
- يمة مرتي...

- على كيفك يايمة....يابعد عيني..تره ماكو مرة ورجال ماتصيربيناتهم مشاكل..حتى مصارين البطن تتعارك يابعد أمك
-أعرف يمة..أعرف..هسة آني ماكلت أكو واحد كامل .بس يايمة لوتعرفين شسوي..جان تكولين.... الله يساعدك.
يمة مرتي ما صبت لي فد يوم مركة بيها لحم...لو بيها عظمة شوي باقي بيها جلافيط... لو عظمة خالية..الله وكيلج
وكلما أسألها ..شنو ليش مخالة لحم بالمرك..تجاوبني وتكول ..خليت بس ساح اللحم بمية المرك

الله يخليج يمة..شسوي..شوفيلي شارة؟
-على كيفك يابعد أمك..دأرجع يابعد روحيتي .لبيتك.وماكو ألا الخير..أن شاء الله.
ولم تمضي فترة حتى جاء دور الأبن الأصغر لزيارة الحجية و...تعرفون الباقي!!!!!
ودار مقطع الحوار التالي بينهما فيما يخص مشكلة الأبن الأصغر:
- يمة...عليج الله يمة د تدعيلي؟
- يمة..فدوة لعينك...الله شاهد أنت وأخوتك متنزلون من حلكي..شعندي يايمة بهالدنيه غيركم ...ليل نهار أدعي الله يريحكم ويرزقكم العويفة ويسترعليكم وعلى جهالكم ..شبيك يمة شو أحسنك ممرتاح؟

-يمة...مرتي راح تخبلني....(وهنا لم تقاطع الحجية ولدها بل تركته يكمل ماعنده)...جننت أبو الخلفني...

كلما سمعت خبر لو صوت لومصيبة بالشارع لكفت عبايتها وطلعت وعافت البيت.
جاهل يبجي...أكل على النار...آني بالحمام دا أصيح على خاولي..ماألها علاقة...سمعت عياط...هلاهل...عركة...خلت عبايتها وطارت.
-يمة...دأرتاح هسة والله كريم...ماأكو مشكلة ماألها حل لكفت عبايتها وطلعت وعافت البيت.
جاهل يبجي...أكل على النار...آني بالحمام دا أصيح على خاولي..ماألها علاقة...سمعت عياط...هلاهل...عركة...خلت عبايتها وطارت.

-يمة...دأرتاح هسة والله كريم...ماأكو مشكلة ماألها حل ..بس أنت دا أصبر يايمة ولا تنرفز لوتحرك بروحك ,,وأن شاء الله ماكو ألا الخير.
وهنا قررت الحجية زيارة كل ولد على حدة وأن تمضي عنده في بيته عدة أيام ,لتنظرفي الأمر.

في ببت الأبن الكبير ذهبت ومعها دشداشة نوم ومكياج وعطر ومسواك. وأستطاعت بعد أيام قليلة من تغيير حال الزوجة التي بدأت تغسل وتتزين وتتعطر زوجها قبل النوم.

وفي بيت الأبن الوسط كان لها هذا االمقطع الطريف مع زوجته.بعد ما رأت أن الزوجة لاتصبر على اللحم لحين أن ينضج.بل تأكل منه قليلا ثم قليلا ...تنتف اللحمة نتف

الحجية- يمة...يعيني..لتفتحين الجدر..صبري خلي اللحم يستوي بالأول.. هاي أذا كلساع فاك الجدر ..ماتبقى لحمة لرجلج!!!!!!!
فكانت الحجية بالمرصاد كلما حاولت الزوجة فتح القدر..ومع الأيام تعلمت وتفهمت أن اللحم يحتاج فترة لينضج..لم تعد محرجة مو أستفسارات زوجها وتوبيخه لها على قلة أو أنعدام اللحم بالأكل.

والآن حان دور الأبن الأصغر وكانت الحجية على موعد مع هذا الحوار مع اازوجة, بعد سماع الزوجة أصوات في الشارع:
الحجية- يمة وين ماخذة عبايتج ورايحة?
الزوجة- عمة..هسة أرجع ..بببببس دا أشوف ..شكو شصار
-يايمة..ياعيني..شكو عايفة البيت ورايحة ....(ولم تكمل الحجية..فقد أخذت الزوجة عبايتها وطلعت)

وعلى هالحال رغم كلام الحجية للزوجة عن الأخلاق والدين وواجب الستر وغض النظر وحرمة الجار...ماكو فايدة
فقررت الحجية أن تجلس على الأرض وتحتها كل عبايات الزوجةالموجودة بالبيت

وصارت هلاهل بالشارع....والزوجة تفتر بالبيت مثل المجنونة تدور على عباية لوشئ تخليه على راسها.

الزوجة- عمة فدوة لعينج ..هاي أنت كاعدة على العبي!!!....عمة ألله يخليج بس دقيقة دا أشوف شكو بالشارع ..دأنطيني وحدة الله يطيج ؟
الحجية- ماكو ولا عباية وحدة انطيج..شكد حجيت وياج وكتلج..صارلي أسبوعين وأكثر أحجي وماكو شارة ...مايفيد وياج غير هيجي!!!!
الزوجة لم تنتظر كلام الحجبة فأخذت حصيرة من الحصيرة المفروشة
على أرضية المطبخ...وضعتها على رأسها وخرجت تهلل.
وهنا صفقت الحجية المسكينة والحزينة على أبنها الصغير أيد بأيد...محدثته بقولها:
ياوليدي...كل أخوانك أنعدل حال بيتهم وأنت يابعد روحيتي ماألك شارة....(حل)
كلهن تصير...ألا أم الحصير.