كيد النسوان

[جنة المشتاق]

السلام عليكم ورحمة الله وبركاته
هذا حوار دار بين صديقتي .. ارجو لكم الافاده والاستمتاع

- تدرين يا سارة، أنا من تزوجت وقاعدة اكتشف طبايع فيني تفشل.

- غريبة توج تحسين؟ هذا وانت متزوجة من 10 سنه، عيل لو بعد عشرين سنة، شنو بتكتشفين؟
- ههه على قولتج، بس ما سألتيني شنو هالطبايع؟
- لو سألتج شنو بستفيد؟ أكيد بتخليني انتبه عن أشياء فيني، يبيلها ستر.
- تدرين اشلون؟ كل وحدة فينا خليها تتكلم بصراحة عن الأمور اللي متغيرة فيها وما ودها أحد يدري عنها، يمكن نفضفض عن اللي بنفسنا.
- ممم خوش عيل، ابدي انتي عن نفسج.
- ممم، أنا كل مازعلت من زوجي، أقفل علي داري 3 أيام، وهو يترجاني آكل عشان ما يصير فيني شي، ويطلع بالشينة عند أهلي، بس الصج اني حاطه تحت سريري ما جله حق أسبوع، وبعدها يضطر يراضيني بكل اللي أتمناه!
- وأنا مستغربه من شي، ليش كل ما تهاوشت مع زوجي أذكره بالهدايا اللي شريتها له، لدرجه آخر مرة قالي تبيني أعصر اهدومي عشان العطر اللي شريتيه لي قبل سنه.
- وأنا مضايقني أني دايما أقول لزوجي واعيالي اني أنا اللي أطبخ الغدا، والصج ان شاندرا هي اللي تطبخ، وأنا ما أدخل المطبخ إلا قبل لا نحط السفرة بعشر دقايق.
- وي شخباري.. أنا من زمان قاصه عليهم بهالسالفة، ساعات أشتري الغدا من برة وأقول لهم «صنع ايدية وحياة عينية».
- ههه طلعتي مو هينة، بس السالفة الأكبر من جذيه، اني قمت آخذ فلوس من زوجي بدون حاجة، يعني أقوله اني محتاجتهم لشي ضروري، وساعات (استغفرك ياربي لا تحاسبني) آخذ من جيبه بدون لا يدري. وأحطه بحسابي.
- لا عاد مو هالدرجه أنا عمري ما سويتها، بس اللي مضايقني اني دايما أغث أمه وأسوي فيها مقالب عشان تطلع من بيتي، وإذا ياب سيرتها قمت أتشرق باسمها وأقوله هذي حسبة أمي لا تحاتي حاطتها بعيوني أفا عليك.
- تصدقين، طلعنا مو هينات على هالسوالف، ولو تكلمنا لباجر ما خلصنا.
- ههه، وأنا عندي لج سالفه شينة حدها سويتها بحمواتي، ما هقيت اشلون كنت شريره حزتها، هههه.
- هههه قولي قولي.. ومنكم نستفيد.
- ذاك اليوم كانوا أهل زوجي زايرينا عالعشا، وبعدين...

شي ما شفتوه:

- سارة.. أمس يوم رجعت البيت وتذكرت سوالفنا، قمت أضحك، وقلت: ليش ما نطلع كتاب ونسميه «كيد النسوان»، ونخلي الحريم يطبقون اللي فيه على رياييلهم وحمواتهم؟
- وي من صجج؟ أنا كل اللي قلته لج مو صج، بس كنت بساعدج عشان تفضفضين عن همومهج.

- يعني شنو؟

- يعني.. ربي يعين زوجج عليج ههه


منقول /أنوار عبدالرحمن/الكويت

[محبة لاهل البيت]

هاههههههههههههههه
قصه حلوه وبيهه معاني جميله
بارك الله بكي

[جنة المشتاق]

حيــــــــــــــــــــاج غاليتي
نورت الصفحة بمرورج
موفقة >_*

[ام شبر]

هههههههههههههه

صحيح النسوان كيدهن عظيم

بس هذي القصة ظلمتنا يعني ما تكلمت عن كيد ام الزوج او اخته اويلي منهن ومن كيدهن

ههههههههههههههههههه

مشكورة حبيبتي جنة المشتاق على هذه القصة حلوة

صحيح تخلي كل وحدة من عندنا اتراقب نفسها وتلاحظ افعالها

الله يهدينا هههههه

[جنة المشتاق]

أم شبر .. مرورج وسام ..
يسلموا .. الله يوفقج >_*