منو الشاطر فيهم؟

[جنة المشتاق]

المعلمة لطيفة، تؤدي واجبها نحو تلاميذها في «الروضة»، وتنشئهم على مبادئ وأخلاقيات راقية، وهذا جزء من حوارها اليومي معهم.

• ـ يا أطفال يا حلوين.. منو فرش أسنانه اليوم، قبل ما يجي الروضه؟
• ـ أنا يا أبلة.
• ـ وأنا بعد..
• ـ وأنا..
• ـ عفيا عالشاطرين.. ومنو فيكم اللي رتب سريره قبل لا يطلع من غرفته.
• ـ أنا يا أبلة..
• ـ وأنا بعد..
• ـ وأنا أحسن منهم، لأني كل يوم أغير شرشف افراشي وأحطه بالحمام.
• ـ عفيا على نصوري الشاطر.
• ـ أبلة لطيفة.. أصلا نصور هذا يقص عليج، لأنه يسويها على فراشه، عشان جذيه يغير شرشفه كل يوم.
• ـ جذاب جذاب.. انت اللي اتسويها.
• ـ خلاص.. خلاص لا اتهاوشون كلكم شطار، وأبي أسألكم منو اللي يحب راس أمه وإلا أبوه وإلا جدته قبل لا يطلع من البيت.
• ـ أنا يا أبلة.
• ـ حتى آنا..
• ـ يا حليلكم، كل الصف شطار.. أنا مستانسة منكم لأن كل واحد فيكم، يفرش اسنانه ويرتب سريره ويحب راس أمه وأبوه.
• ـ أبلة لطيفة.. أنا أمي اهي اللي تحب راسي قبل ما ايي الروضة، أمي شاطرة صح؟
• ـ إي شاطرة، وانت بعد حب راسها عشان تاخذ حسنات وايد.
• ـ واللي يحب راس خدامتهم؟
• ـ لا.. ما يصير.
• ـ أنا شفت جدي يحب إيد خدامتنا.
• ـ هههه.. عيبوا عليه.
• ـ بس خلاص يا أطفال، وانت يا محمد اسكت، عيب تقول هالكلام.
• ـ أبلة لطيفة سألينا بعد.
• ـ مممم.. منو فيكم ساعد أمه وإلا أبوه في أي شغل بالبيت وإلا بره البيت.
• ـ أنا.. رحت أساعد أمي بالمطبخ، بعدين هاوشتني قالت لي انتي صغيره.
• ـ وأنا قلت لأمي بنظف طاولات البيت، قالت لي روحي لعبي، هذا شغل الخدامات.
• ـ وأنا ساعدت أبوي بالديوانية، أجيب له القهوة.
• ـ وأنا أبوي قال لي لا تطلع صوت لما أنام الظهر، وسمعت كلامه.
• ـ وأنا بعد.. اسمع كلام أمي وأبوي.
• ـ شاطرين يا حلوين.
• ـ أبلة أنا ساعدت أبوي في الجاخور، اعطي أكل للعنز والبعارين.
• ـ واااي أبيييه لأ..لأ.. هذا خطر عليك يا مشعل.
• ـ ليش أبلة؟
• ـ لأن ممكن الحيوانات هذي تأذيك.
• ـ أبلة هذولي عنز.. مو أسود.
• ـ أدري بس انت صغير.
• ـ أبلة أنا مو صغير، أنا رجال!
• ـ أي صح.. أحم.. انت رجال.
• ـ أبلة.. ولدج سعود شاطر؟ يسمع كلامج؟
• ـ طبعا سعود ولدي وااايد شاطر، ودايما يسمع كلامي، وأول ما يقوم الصبح يفرش أسنانه ويغير ملابسه ويصلي، وما يطلع من غرفته إلا وهو مرتب افراشه، ويحب راسي كل دقيقة ودايما ألـ...

شي ما شفتوه:

• ـ سعووود تعال اهنيه يا نزقة ابليس.
• ـ شنو يمه؟ ليش اتصرخين؟
• ـ أكيد أنت اللي كسرت دريشة الصالة؟ مو قلت لك لا تلعب مع ربعك بالكرة داخل البيت؟
• ـ سامحيني هذي آخر مرة اهئ اهئ.
• ـ ما اقول إلا هذا من ردى حظي، ياليتك تصير بنص عقل اليهال اللي أدرسهم عندي بالروضة، صج باب النجار مخلع.
• ـ يمه... انتي شفتي الباب اللي كسرت قفله؟.. حسبالي ما تدرين؟
• ـ شنووو؟ وبعد كسرت قفل الباب؟ اهئ اهئ اهئ.