الزهراء مع ابيها في مولد الحسين ع

[نور الولاية علي]

بسم الله الرحمن الرحيم
اللهم صل على محمد وال محمد
السلام على الزهراء البتول الطاهره وعلى ابيها وبعلها وبنيها

الزهراء (ع) مع أبيها (ص) في مولد الحسين (ع)


(البحر الطويل -نبطي-)

1. بين طه او فاطمة خيرة نساء العالمين
سالت ادموع الفرح و الحزن في مولد حسين

2. من حمل طه وليده و صار مرّة ايقبِّله
و مرة يتأمّل ابنحره و المدامع هامله

3. و يهمس ابإذنه و ينادي آه يعرصة كربلا
و فاطمة تنظر لبوها و الحزن بادي بالعين

4. صاحت اشصاير يبويه حيرتني ابهالفعل
خوفي بس لاحظت عينك عيب في هذا الطفل

5. ﮔال يا زهرا يسبحان الله بدر او مكتمل
بس ذكرت اللي يصيبه ابكربلا ساعة البين

6. ﭼني أنظر كربلا خيل و عساكر حاشدة
و السبط وحده يشوف احبابه كلها اموسّدة

7. لا أنا وياه لا خوه الحسن لا والده
والله ما مرّت على بال الزمن محنة حسين

8. ﭼني انظر للسهم في وسط ﮔلبه يستقر
و ما يظل عنده جلد و يطيح من فوﮒ المهر

9. بس يزهره مﮕدر اتحدّث عن افعال الشمر
فوﮒ صدري ﭼنّه يصعد يﮕطع ابسيفه الوتين

10. فاطمة صبّت مدامعها على نحر الوليد
ﭼنها ترسم موضع البتّار في ذاك الوريد

11. ﭼان يا مُختار طفلي انكتب مذبوح او شهيد
منهو ينصب ماتمه و يهمل على ذبحته العين

12. يخلﮓ الله يا بتولة شيعة تنصب ماتمه
على مر الزمن لمصيبة حبيبﭻ لاطمة

13. بالعزا و النوح ما تهدأ أبد يا فاطمة
من تمر بيها مصيبة تذكر امصيبة حسين

14. تذكر امصيبة حسين و تنصب اعليه العزا
من مدامعها تغسِّل جثّته و تجهِزّه

15. والله يا محزونة غير الجنّه ماليها جزا
لازم ابعرصة المحشر بيده ياخذها الحُسين