[الحوراء الأنسية]

وأني أول الحاضرات أين
طبعاً بديت قبلكم وتعلمت بنتي وصارت تعتمد على روحها وتقول بس ردت صارت الاسبوعين اللي طافوا انتكاسة عنيفة ولا كنها تعلمت تعبت نفسيتي هي لأن بعض المرات كانت تتعيجز وتسويها في ثيابها وكنت أعاقبها والظاهر العقاب جاب نتيحة عكسية بس ألحين جودت روحي عن العقب وإن شاء الله تصير أحسن

أني عن طريقتي كنت ماخدة إجازة اسبوع ولأني دوامي طويل ما كان في مجال اتدرج وياها
فبدأت وشلنا الحفاظات نهائياً واشتريت ليها هافات جديدة فيها رسومات حليوة وشجعتها ليهم وقلت ليها الحفاظة فيها دودو وهدي الوردة والدادا ما نبغي نوسخهم
وكنت أول يومين كل ربع ساعة أوديها الحمام
وطبعاً للتشجيع اشتريت ليها نجوم وملصقات لول كاتي
وكل مرة تروح الحمام أحط ليها في إيدها أو في خدها وتستانس حتى تروح لعماتها وتراويهم
وأخليها هي اللي تختار الملصق اللي تبغيه
ويوم لاحظت إنها تاخد وقت طويل بين كل مرة والثانية تاخد ساعات في البداية فقمت شوي شوي اقلل وأوديها كل نص ساعة بعدين كل ساعة

وألحين قلت يمكن تمللت من الملصق اللي على الإيد
سويت ليها اللوحة ورسمت فيها ورود حلوين وكتبت فيها اسمها وقلت ليها هدا فطوم الحلوة
وخليتها تلصقهم فيها وأشوف استانست بها
وإن شاء الله ترد تصير أحسن

يالله أمهات
أهم شي في الشغلة الإصرار والعزيمة وترى حلو إن سطل الحمام نظيف وحلو ما تحاتين التبديل وخصوصاً الحين في الصيف بنتي تموت من الحرار كانت لأن جلها واجد حساس
ألحين افتكت
أني حتى لما اعتفست ما لبستها حفاظة عشان تعرف إن لا رجعة ابداً للحفاظة

ولا تعلمون أحد لأن العين من الشيطان


ركزوا على هالنقاط المهمة:

1. جهزواالنونية اللي احنا نسميها (قيصرية) ويفضل إنه تكون مشجعة من ناحية الشكل والألوان ، وأيضاً مريحة لأن في البداية الطفل مو متعود ويمكن تاخذين وياه فترة في الحمام تصل لعشر دقائق أو ربع ساعة.
2. أدوات التشجيع من الملصقات واللوحة إن أمكن وبعض الهدايا الصغيرة أني لأنها تحب تخربش اشتريت ليها مرة علبة ألوان صغيرة (100 فلس) من فخر البحرين وترى هالمحلات مليئة بالأشياء الصغيرة المفيدة .
3. التشجيع المعنوي لما يروح الطفل الحمام حتى لوما سواها في البداية مجرد رغبته في الروحة للحمام تعد دافع لأن يواصل المشوار وينجح فيه ، مثلاً أتن تخبري من في البيت الأب أو الأخ او ألخت أن فلان شاطر راح الحمام أو سوى أس في الحمام ، أحيانا مباشرة لما تسويها في الحمام أصفق ليها وأقول ليها شاطرة ، ولما تطلع أقول لأخوها يصفق ليها.
4. حاولي تمسكين أعصابش عن الصراخ والعقاب قد ما تقدرين لأن قد يهدم كل شيء .

ويالله أخواتي تعالوا
وخلنا نحقق هالإنجاز الصعب

وبالتوفيق