[جنة المشتاق]

مذكرات زوج رقم 5

يوم الخميس 8/3
صچ هالأيام أحس براحة، من أدش البيت الكل نايم، وحتى أم العيال من كثر تعبها في الدوام ولويتها مع العيال والبيت، ماتصير الساعة 9 الليل إلا ونامت مع اليهال مثل الدياي، وچم مرة مسكينة من تحس فيني داش البيت تحاول تشيل نفسها من الفراش، وتسألني إذا أبي شي أو محتاج شي، وآنا أقص عليها أقول لها لأ روحي نامي أنا أبي راحتچ أهم شي عندي بالدنيا، وما تدري اني برتاح من شوفتها وأفضى حق الجو مالي أيااابا.

ردة فعل الزوجة:
لا مو امصدقة كل هذا يطلع منك، وحسبالي اتدور راحتي كل هالمدة؟ لكن ما قول إلا آنا الحين اللي برتاح من شوفتك دام كانت نيتك شينة واتسوي كل شي من وراي لأني صدقتك، موووت فكة منك والله حسيبك.

مذكرات زوج رقم 6

يوم الثلاثاء 9/6
اليوم صار بيني وبين زوجتي خلاف على شي بسيط، والسبب إني قمت ما استحمل منها أي زلة أو خطأ، ودي أقول لها إني ندمان على اليوم اللي تزوجتچ فيه، لو متزوج أخت رفيجي فايز (أموله) أبرك لي من هاللي عندي، بس طافت علي واهي تزوجت من واحد ما قدرها، ومن دريت انها اتطلقت وآنا قاعد أدور أي غلطة صغيرة من زوجتي عشان ألقى مبرر حق زواجي من حشاشة يوفي (أموله) اللي روحي معلقة فيها، بس متى؟

ردة فعل الزوجة:
آنا أقول ليش الريال يدور عليّ الزلة وآنا مو امقصره معاه، أتاري السالفة فيها أخت رفيجه اللي امجابله ليل نهار؟ آنا المخدية والغبية اللي ما لاحظت هالشي، والمصيبة يدلعها وامسميها (أموله) هذي حدها ينادونها (أميلوه) ويخب عليها، بس الحمد لله اللي ربي خذا روحه وما طال منها شي، وآنا اللي باخذ غيره وأقول الوفا حق هالأشكال غبااااء، ولا للوفا لا و ألف لاااا.

مذكرات زوج رقم 7

يوم الأحد 15/9
باچر بتبدي المدارس وأنا مستعد مع العيال وقلت حق هالمرة اللي عندي أني مابي اتعبها، وآنا اللي بودي اليهال وأييبهم من المدرسة واستانست، ما تدري أني فرحان أكثر منها لأني بصادف كل يوم أبلة بنتي، وأكحل عيني بشوفتها، بس لو تعطيني ويه أرتاح.

ردة فعل الزوجة:
وآنا أقول ليش خاب نفسه وشاد حيله يودي العيال وييبهم بدون لا يتشكى؟ ربي لك الحمد اللي كشفته وطاحت بيدي هالمذكرة، لكن صاچة اللي قالت «يا امأمنة بالرجالة يا امأمنة الميه بالغربال» وكفو على هالأبلة اللي ما عطتك ويه يالخاين.

مذكرات زوج رقم 8

يوم الإثنين 5/8
تاريخ اليوم يصادف تاريخ زواجنا، عطيتها هدية بس عشان تصك حلچها، ودزيت لها نغمة اهداء على موبايلها، وقلت لها انها بمناسبة حبنا اللي استمر 10 سنين في عش الزوجية، لكن هذا بالمشمش، أي حب؟.. وأي بطيخ؟.. أصلا اهي لو تقعد يمي أحس اني قاعد مع واحد من الربع اللي چنه بودي قارد، ما قول إلا يارب صبرني.. وعطها اشوي من هالأنوثة اللي عند باجي الحريم.

ردة فعل الزوجة:
آآآنا لو تقعد يمي تحس انك قاعد مع واحد من الربع؟ آآآآنا ما فيني أنوثة ياللي ما فيك ريحة رجولة؟.. آآآخ لو ادري أنك كاتب فيني چذيه قبل لا تموت چان ساحبتك من ارقبتك چدام الأولي والتالي، وأخليك بيزة ما تسوى.. آآآخ لو بس مو ميت.. لكنك رحت من ايدي يا حسافة، وإلا چان شرشحتك تشرشح ونشرت اصورك بالجرايد عبرة لباجي الرياييل.