|
|
عدنا
أم جعفرين إن شاء تغميضة عين وتفتيحتها وتتيسر كل أمورش وتخلصين كل فتفوتة في الشقة .. أهم شيء ألحين انش انتقلتين واستقريتين |
فاتي زيزي
اني بلسومز اعرف نفسي للي مايعرفني عندي ولدين حسن ومؤمل |
أني خاطري آخذ لعمتي غسالة اوتوماتيك بس أخاف ما ترتاح ليها ويمكن بعد ما عندهم مكان يحطونها ، أني قلت لزوجي من قبل بس ما تحمس بس للحين الفكرة تحوم في جبدي أحسها اريح ليها ... ما أدري احطه قدام الأمر الواقع ؟؟؟!!! بس أخاف بعد عمتي تتضايق ؟؟!!
|
اذا يمديكم اتجوا تخفيضات السعودية ببلاش بصراحة وفرصة تتشروا للصيف
|
هلا أم حسن شخبارش
أمس في الظهران ووقت الصلاة ادور ما عندي كلينكس عاد شفت وحدة تصلي ويصلي قريب منها ولدها على كلينكس طلبت منها وانا مستحية وبعدين قعدت اتخيل اقول يمكن هي ربيعية أو بلسومز أو نور الآيات أو اي وحدة من اللي معانا في عروس الشيعيات !!! |
هلا ام حمود هههه ان شاء الله نتلاقى على خير في الافراح
ان شاء الله حصلتي شي في التخفيض زين سويتي جيتي وسط الاسبوع اهدأ خميس وجمعة المجمع ماينطب من الزحمة |
أم حسن اي الحمدلله أحس اتوفقت في المشتريات وكتبت شنو أخذت في صفحة 42 أو 43 ... بس حسيت البضاعة الأحلى كالعادة بضاعة البنوتات
|
ياعلي من شغلة الى شغلة ولا احنا مخلصين
|
رياحين مشكورة خيووو على تلبية الدعوة وبعد اذا تعرفين احد خبريه عن المنتدى هني ناخذ راحتنا اكثر في الكلام وصراحة انا وايد كنت ارتاح لكم انتي وربيعية وريحانتي بعد بس المنتدى ذاك فرقنا بس انشاء الله نتجمع كلنا هني
|
الحمد لله ام حموود حصلتي
ماادري اخبار التخفيضات عندكم في البحرين كم نسبتها؟ |
أم جعفرين اني بعد اليوم الشغل زايد بس الحمدلله واجد في طباعة وصفحات اشكثر فعلى ما يكمل البرنت اطقطق هني
|
صادقة ام حمود غمض وعين وفتح عين وكل شي يستوي
انتي جيس النبض عندهاا شوفي ويش رايها في الغسالات وثانياا حجمهم اصغر من الغسالة العادية اني عمتي من قبل مااتايدهم بس الحين تمدح فيهم هي بناتها مايخلونها تغسل ثياب اصلا بس ساعات تضطر اذا هم في المعهد صراحة استحي واحس اني مقصرة مع امي لما اشوف حمواتي شلون يتشغلون عن امهم وووايد تغيرت من بعد ماعرست صرت اشتغل اكثر مع امي |
تسلمي ام فاتي وزيزي
اني قلت باقول الى اخواتي يجوا معانا هني هناك اخترب المنتدى بصراحة من طلعتوا وناس واجد طلعوا مع اني للحين ادخله لكن اسلي نفسي عن الملل |
للحين نسبة التخفيض اهني تتراوح بين الــ 25 و50% وفي محلات قربت تنتهي تخفيضاتها عندكم وهنا للحين ما بدأت مثل آدمز وbhc وتاب ألويا
|
اني من شغلة الى شغلة وغير االاكوام مال cpr الي صار لهم موقفين كم شهر وغير شغل الهئية والقهر انه البونس ينعطا من الي يوجهون العمال بس واحنا الي نكرف كرف وومحارب على شغل الهئية ببلاش شغلتنا
|
بنزل ثياب اولادي الحين روحوا شوفوهم
|
بلسومز اكيد بيخترب دامهم مايبون طاري شيعة على لسانهم مادري ليش هالحزازيات عندهم لنا
بس تدرين رب ضارة نافعة وعن التخفيضات اخر شي سمعته انه لايف ستايل مسوي تخفيضات تقريبا 70% بس خسارة الحين مااقدر اروح no budget خخخخ |
أم جعفرين اي هي الغسالات واجد اريح احس لو ما هي استخف وبعد فايدتني في شغلة اني ما البس حمود جديد بدون غسال فاضبط الغسالة على أقل شيء 12 دقيقة بس أو إذا شي ع السريع بعد اخليه 12 دقيقة وبعدين فوق الدفاية !!! ونص ساعة وهو جاهز للباس
|
اوكوو ياعيني على النشاط اللهم صلي على محمد وال محمد مانبي نحسدش خيوو نزليهم وبنروح نشوف
|
اووه تقنية مفيدة هي رقوم اني صراحة مااغسل الثياب الجدد مع انه اامن بس تعرفين يبالهم عبالة وغير الي عندي اوكوام ثياب توني مغسلة يوم الجمعة وشوفي سلة الثياب متفجرة وطاالع لبره الثياب
تدرين اكتشفت انه الغسالة في الحمام افضل لاني حاطتها في المطبخ الحين بس عقب بسقف لي للحوض وبنطلع الغسالة بره خير شر خخخ بنفتك من دوشتهاا |
بردانة مع انه اليوم لابسة فانيلة سودة من المتان شووي هي ماخذتها من بيرفكت جينز من اللعام بس وايد كولتي الخلق مالها وهي ماركة old naivy
|
توتوتو توتوتو هي اغنية فطوم تجنني اذا ترددهاا عاد بلحنها وزنوب الحنونة كله عندها لعبتها الخلق جابتها عمتي من ايران لو وين تروح وياه مااسمع الا تسوي بوزها مس مس عاد صوت المرضعة واليهال يشرب منها حليب ولا ترز صبعتها في بوز اللعبة وتشيلها وتقلبها على ظهرها وتقول ليها ناني ناني نانيااااني يعني ناامي نااامي
|
عمري عليهم الحلوات ... أم زنوب من صغرها ما شاء الله عليها
|
خلاص نزلتهم
وعلى سالفة غسال الثياب اني يوميا اغسل ثياب ولا في فايدة بسرعة يتجمعوا |
أم حسن البلوزة الثانية اللي من h&m بــ 11 ريال شاريتها من تخفيضاتهم هني في البحرين بـــ 35 ريال خخخخخخ !!! شريتها أول يوم للتخفيضات وأمس صارت تخفيضاتهم 75% يلا هذا نصيبي ، وهم أفرول شريته بــ 55 ريال تقول أختي صار بــ 20
|
وينكم خلاص الحين صدق بنطلق من قلب في الشغل سي يو ليتر بعدين بجي بشوف الثياب سيااا
|
واااااو ب 35 اني اخذته اول يوم 50% و ب11
والافرول اخذته ب 44 مع انه الشركة وحده بس الاسعار تفرق |
بروح اشوف الصور عجل
|
باكوااااااااا
|
برب
هل الشغل مثل المطر ... بخلص غلاف التقرير ورادة |
أم أحمد طلت الصبح شوي وبعديم ما أدري وين اختفت خاطري فيها
|
السلام أوه
رياحين خلف جبدي حياش الله أم حمود الحمد لله انش توفقتين في المشتريات وعليه بالعافية الحمد وعن سالفة الغسالة اتأكدي اول لأن أغلب النسوان ما يرتاحون للأوتو ماتيك لأنه يحبون يصبصبون الماي بنفسهم على الثياب وما يستطهرون غسال الأوتو ماتيك يضحكون يقولون جدي غير تصلين على النبي عليهم جداك نا يطهرون انزين صلوا على النبي عليهم وهم في الغسالة بس ما يقتنعون جيكيها أحسن أول وأني يبى ليي أتشرى ثياب بس صاير المود مالي مو مال تشري حتى لو أروح ألايم تالي أرميهم وأمشي وأني صار ليي كم يوم أنغفص في الشغل داك الأسبوع خلوني ل3.30 وأمس قعدت ل2 ويالله بقوم بصلي وبعدين البيت طياري إن شاء الله مايأخروني وادعوا لفطومة بالشفاء مريضة أمس جيت والراس يدور الشغل من قلة النوم |
يا علي صار ليي موقف يفشل عدل
كنت قاعدة أتصفح في ملتقى البحرين ومفتوح نور فاطمة وفداء وعالم حواء وعروس ... دخلوا ثلاثة المكتب اطالع مو مستوعبة ودرت راسي عنهم واصكك في هالصفحات ولما قربوا مني أدور للي ويايي إلا هم واقفين هني استوعبت شوي ووقفت إلا يقول واحد منهم متأثرة من محرم للحين في أجواء عاشور وبعدين سألني ويش اسمش قلت ليه إلا يقول في مآتم قاعدين مو في مكتب !!! وهذا اللي دخل وسأل الوزير !!!! |
عيون ريمي ماتشوف شر القمر ماعليها الا العافية
|
ما تشوف شر فطومة سلامتها الحلوة ألف سلامة عليها
|
هههههههههه ام حمود ضحكتيني صحيح فشلة
ماعليه على قولة المثل تحصل في احسن العائلات |
بيه ام حمووود وافشلتاااااااااه يضحك موقفش عاد ويه الوزير مرة وحدة اني اذكر يوم كنت هناك دخل الوزير ودار لي وقال لي شخبارش استحرقوا علي مال القسم يقولون انجان كلمتنينه عشان يوظفش
|
تصدقين أم جعفرين وحدة اعرفها مرة بعد الوزير يلف على الأقسام وسلم على وحدة وسألها عن اسمها تجرأت وقالت ليه أنها مو مثبتة قام وخلاهم يثبتونها وفعلا صار
عاد أني وحر قلباه توها بثواني كنت أكرف في الملفات وما دخل إلا بعد ما خلصت وقعدت اتصفح فارتبكت حدي |
ام احمد ماعليها شر الحلوة وانشاء الله الحين وصلتي بيتش بالسلامة
الذين يشاهدون محتوى الموضوع الآن : 2 ( الأعضاء 2 والزوار 0) أم فاتي زيزي, أم حمود بقينا الى وحدناا ام حموتي على قولة بناتي |
| الساعة الآن 03:48 AM. |
Powered by vBulletin® Version 3.8.7, Copyright ©2000 - 2025, Jelsoft Enterprises Ltd. TranZ By
Almuhajir